ධජය

රෙජිමේන්තු ලාංඡනයේ සලකුණ ලෙස දෙහිස් රාජාලියා තෝරා ගැනිම සුදුසු යැයි මේජර් ඩී එස් ආටිගල එම්වීඕ විසින් අනුමත කළේය. රෙජිමේන්තු රණ වාදනය ලෙස “අන්ඩර් ද ඩබල් ඊගල් “ වාදනය තෝරා ගැනීමේ හැකියාවද මේ නිසා ඇතිවිය. පසුව ඔහු අප ලාංඡනය සඳහා සුදුසු චිත්‍රයක් නිර්මාණය කිරිමට ලුතිතන් එස් ඩී එන් හපුගලට පැවරුවේය. පුරාවිද්‍යා දෙපාර්තමේන්තුවේ සිටි අභාවප්‍රාප්ත කේ ජයතිස්ස මහතාගේ ආධාර ඇතිව ලුතිතන් එස් ඩී එන් හපුගල විසින් පහත දක්වා ඇති චිත්‍ර ඉදිරිපත් කළේය. රෙජිමේන්තු හිස් වැසුම් ලාංඡනයෙන් දැක්වෙන අර්ථය මොවුන් දෙදෙනා විසින් සකස් කරන ලද අතර, එය මේජර් ඩී එස් ආටිගල එම්වීඕ විසින් අනුමත කරන ලදී. මුලින්ම සිදුකල නිර්මාණය අනුව ලාංඡනයේ පක්ෂියා සිහින්ව දක්වන ලදී. ප්‍රතාපවත් බව දැක්වෙන අයුරින් වඩා සම්පූර්ණ පක්ෂියෙකු අවශ්‍ය බව මේජර් ඩී එස් ආටිගල එම්වීඕ විසින් ප්‍රකාශ කරන ලදී. තවද එයින් ශ්‍රීමත් වින්ස්ටන් චර්විල්ගේ දෙවන ලෝක සංග්‍රාමය පිළිබඳ මතකයන් වන යුද්ධයේ දී - අධිෂ්ඨානය, පරාජයෙහි යටත් නොවන බව, ජයග්‍රහණයේදී - ශ්‍රේෂ්ඨත්වය, සාමයේදී - සුහදතාවය ආදිය හුවා දැක්විමට ඔහු අදහස් කළේය. මෙම කර්තව්‍යයේදී කේ ජයතිස්ස මහතා විසින් දෙන ලද විශිෂ්ඨ සහයෝගය බලකාය කෘතඥ පූර්වකව සදා සිහිපත් කරන්නෙමු.

රෙජිමේන්තු ලාංඡනයෙන් පිළිබිඹු කෙරෙන අර්ථය

හේරුණ්ඩ පක්ෂියාගේ ලක්ෂණයන් ලෙස පෙර ඉදිරිපත් කළ කරුණු අප රෙජිමේන්තුවේ ලක්ෂණයන් හා කාර්යයන් සමග ඉතා සමානව පවතී. පක්ෂියාගේ දකුණතෙහි ඇති අසිපත යුද්ධයත්, වමතෙහි ඇති පද්මය සාමයත් පිළබිඹු කරයි. පපුතලයේ ඇති සිංහයා ලංකා ධජයේ ඇති සිංහයා පිළිබිඹු කරයි. මෙම සියල්ලෙහි අර්ථය “යුද්ධයේදී හෝ සාමයේදී අප හදවත් තුල ඇත්තේ අප මාතෘභූමිය පිළිබඳ හැඟීම” යන්නය.

1. ශිරස්ක ලාංඡනය නිර්මාණය කිරීමේ පළමු උත්සාහය
2. පළමුවෙන් නිපදවු ශිරස්ක ලාංඡනය (1956 වර්ෂයේ සිට භාවිතා කරන ලදී)
3. දෙවනුව නිර්මාණය කරන ලද ශිරස්ක ලාංඡනය (1972 දී ශ්‍රී ලංකාව ජනරජනයක් වු පසු)
4. වර්ථමානයේ භාවිතා කරනු ලබන ශිරස්ක ලාංඡනය (1983 සිට භාවිතා කරයි)