පැතිකඩ

මේජර් ජෙනරාල් රසික කුමාර ජ්‍යෙෂ්ඨ නිලධාරී තුමා රුවන්වැල්ල රාජසිංහ මධ්‍ය මහා විද්‍යාලයේ අධ්‍යාපනය ලැබූ, අධ්‍යාපනයට මෙන්ම ක්‍රීඩාවටද එකලෙස දස්කම් දැක්වූ කීර්තිමත් ආදි සිසුවෙකි. ප්‍රාථමික අධ්‍යාපනයේ සිටම විනය, නායකත්වය සහ කැපවීම ඔහුගේ චරිතයේ කැපී පෙනෙන ලක්‍ෂණයන් වන්නට විය. ඔහු 1990 සැප්තැම්බර් 07 වන දින ශ්‍රී ලංකා යුධ හමුදාව වෙත බැඳී පාකිස්ථාන යුද්ධ හමුදා විද්‍යාපීඨයේ පාඨමාලා අංක 1 (PMA 1) යටතේ මූලික පුහුණුව ලද පසුව 1991 මාර්තු 13 දින ශ්‍රී ලංකා යුද්ධ හමුදා විද්‍යාපීඨය වෙතින් දෙවන ලුතිනන්වරයෙකු ලෙස අධිකාරියට පත්ව ශ්‍රී ලංකා යුද්ධ හමුදාවේ කීර්තිමත් බලකායක් වන ශ්‍රී ලංකා ඉංජිනේරු බලකාය වෙත ඇතුලත් වන ලදී.

මේජර් ජෙනරාල් රසික කුමාර ජ්‍යෙෂ්ඨ නිලධාරී තුමා 5 වන කාරක ඉංජිනේරු රෙජිමේන්තුවේ කණ්ඩ භාර නිලධාරී ලෙස සිය වෘත්තීය ජීවිතය ආරම්භ කළේය. ඉන්පසුව ඔහු ශ්‍රී ලංකා යුද්ධ හමුදාව මඟින් සිදුකරන ලද බොහෝ ක්‍රියාන්විත මෙහෙයුම් සඳහා විවිධ නිල හා තනතුරු වල වගකීම් දරමින් සක්‍රීයව දායක විය. ඔහු ත්‍රස්ත විරෝධී මෙහෙයුම් සහ ප්‍රතිත්‍රස්ත මෙහෙයුම් සිදුකිරීම යන ක්ෂේත්‍රයන්හි සුවිශේෂී අත්දැකීම් සහිත දීර්ඝ සේවා කාලයක් හිමි නිලධාරියෙකි. මේජර් ජෙනරාල් රසික කුමාර ජ්‍යෙෂ්ඨ නිලධාරී තුමා 5 වන ක්ෂේත්‍ර ඉංජිනේරු රෙජිමේන්තුව, මත්තේගොඩ සහ 6 වන ක්ෂේත්‍ර ඉංජිනේරු රෙජිමේන්තුව, කොකාවිල් යන රෙජිමේන්තුවන්හි අණදෙන නිලධාරී ලෙස රාජකාරි සිදුකරන ලදි.

මේජර් ජෙනරාල් රසික කුමාර ජ්‍යෙෂ්ඨ නිලධාරී තුමා ඔහුගේ ධුර කාලය තුල හයිටියේ එක්සත් ජාතීන්ගේ සාම සාධක මෙහෙයුම් වල භටපිරිස් සඳහා නායකත්වය දෙමින් සාම සාධක මෙහෙයුම් වල සුවිශේෂී විශේෂඥතාවයන් ප්‍රදර්ශනය කල ජ්‍යෙෂ්ඨ නිලධාරීවරයෙකි. එහිදී ඔහු U9 ශාඛාවේ නියෝජ්‍ය ප්‍රධානියා ලෙස කටයුතු කරමින් තීරණාත්මක අංශ අධීක්‍ෂණය කරමින් සහ කළමනාකරණය කරමින් ප්‍රධාන කාර්යභාරයන් රාශියක් ඉටු කළේය. පසුව ඔහුගේ හැකියාව නිසා U9 ශාඛාවේ ප්‍රධානී තනතුරේ වගකීමද ඔහුට භාර දෙන ලදී. මේජර් ජෙනරාල් රසික කුමාර ජ්‍යෙෂ්ඨ නිලධාරී තුමාගේ විනය, නායකත්වය සහ කැපවීම හේතුවෙන් ශ්‍රී ලංකා යුධ හමුදාවේ මානව හිමිකම් සහ ජාත්‍යන්තර මානුෂවාදී නීති අධ්‍යක්ෂවරයා වශයෙන්ද විදේශ මෙහෙයුම් අධ්‍යක්‍ෂවරයා මෙන්ම මාධ්‍ය හා මනෝවිද්‍යාත්මක මෙහෙයුම් අධ්‍යක්‍ෂක ජෙනරාල් සහ ශ්‍රී ලංකා යුද්ධ හමුදා මාධ්‍ය ප්‍රකාශක ලෙසද සක්‍රීයව රාජකාරියේ නිරත විය. වර්ථමානයේ මේජර් ජෙනරාල් රසික කුමාර ජ්‍යෙෂ්ඨ නිලධාරී තුමා ත්‍රිකුණාමලයේ 22 වන පාබල සේනාංකයේ සේනාංකාධිපති වශයෙන් සහ ඉංජිනේරු සේවා බලකායේ කර්නල් සේනා විධායක වශයෙන් රාජකාරි ඉටු කරනු ලබයි.

අණදීමේ සහ ක්‍රියන්විත පළපුරුද්ද

මේජර් ජෙනරාල් රසික කුමාර ජ්‍යෙෂ්ඨ නිලධාරී අණදෙන්නෙකු ලෙස හෙබවූ තනතුරු

• කණ්ඩ භාර නිලධාරි - 5 වන කාරක ඉංජිනේරු රෙජිමේන්තුව (වැලිඔය, මන්නාරම, ත්‍රීකුණාමලය, පළාලි සහ මත්තේ‍ගොඩ ස්ථාපිතව තිබෙන ලදි)
• විධායක අධිකාරී - 5 වන කාරක ඉංජිනේරු රෙජිමේන්තුව - පළාලි සහ 8 වන කාරක ඉංජිනේරු රෙජිමේන්තුව - කොක්කුතොඩුවායි.
• බුද්ධි නිලධාරී - 8 වන කාරක ඉංජිනේරු රෙජිමේන්තුව - කොක්කුතොඩුවායි.
• නිලධාරි අණදෙන - 81 වන ක්ෂේත්‍ර බලඝණය (කොක්කුතොඩුවායි, නාගරකෝවිල්, මුහමලෛ, සරසාලෛ වැනි ක්‍රියාන්විත ප්‍රදේශවල ස්ථාපිතව තිබෙන ලදි)
• අණදෙන නිලධාරී - 5 වන කාරක ඉංජිනේරු රෙජිමේන්තුව, මත්තේ‍‍ගොඩ සහ 6 වන කාරක ඉංජිනේරු රෙජිමේන්තුව, කොකාවිල්.
• බලසේනාධිපති - 213 පාබල බලසේනාංකය.

මාණ්ඩලික නිලධාරී තනතුරු

ඔහු විවිධ මාණ්ඩලික තනතුරු හොඹවා ඇත

• ප්‍රමානි III - ඉංජිනේරු බලකාය, කනගරායකුලම්.
• ප්‍රමානි II - ආරක්‍ෂක සේනා මූලස්ථානය (යාපනය).
• ශ්‍රී ලංකා යුද හමුදාවේ නියෝජ්‍ය මාණ්ඩලික ප්‍රධානීගේ අධි සහායක.
• මානි I - මාණ්ඩලික ප්‍රධානී කාර්යාලය සහ හමුදා ලේකම් කාර්යාල ශාඛාව, යුධ හමුදා මූලස්ථානය.
• ප්‍රමානි I (ක්‍රියාන්විත) - ක්‍රියාන්විත අධ්‍යක්‍ෂක මණ්ඩලය, යුද්ධ හමුදා මූලස්ථානය.
• ප්‍රමානි I (ක්‍රියාන්විත) - ආරක්ෂක සේනා මූලස්ථානය (වන්නි).
• කර්නල් ප්‍රමානි - 22 පාබල සේනාංක මූලස්ථානය - ත්‍රීකුණාමලය.
• කර්නල් (විදේශ පුහුණු) - පුහුණු අධ්‍යක්‍ෂක මණ්ඩලය, යුද්ධ හමුදා මූලස්ථානය.
• යුධ සහකාර - යුධ හමුදාපති කාර්යාලය.
• අධ්‍යක්‍ෂක - මානව හිමිකම් හා ජාත්‍යන්තර මානුෂවාදී නීති අධ්‍යක්‍ෂක මණ්ඩලය.
• අධ්‍යක්‍ෂක - විදේශ මෙහෙයුම්, යුද්ධ හමුදා මූලස්ථාන.
• අධ්‍යක්‍ෂ ජෙනරාල්- මාධ්‍ය හා මනෝවිද්‍යාත්මක මෙහෙයුම්, යුද්ධ හමුදා මූලස්ථානය.

ශාස්ත්‍රීය වශයෙන් ලබාගෙන ඇති ජයග්‍රහණයන්

මේජර් ජෙනරාල් රසික කුමාර ජ්‍යෙෂ්ඨ නිලධාරී තුමා පහත සඳහන් ආයතනයන් වෙතින් උපාධි පාඨමාලාවන් හඳාරා ඇත.

• යුධ හමුදා අණ හා මාණ්ඩලික විද්‍යාලය, ශ්‍රී ලංකාව.
• යුධ හමුදා අණ සහ මාණ්ඩලික විද්‍යාලය, නැන්ජිං, චීනය.
• ජාතික ආරක්‍ෂක විද්‍යාලය, ශ්‍රී ලංකාව.

තවද ඔහු උපායමාර්ගික අධ්‍යයනය පිළිබඳ ශාස්ත්‍රපති උපාධියක් ද ලබා ඇති අතර, ගෝලීය ආරක්ෂාව, ආරක්ෂක උපාය මාර්ග සහ ප්‍රතිපත්ති සම්පාදනය පිළිබඳ තීක්‍ෂණ හා හසල බුද්ධියෙන් සන්නද්ධව ඇත.

පුහුණු පාඨමාලාවන්

ඔහු පාඨමාලා රාශියක් සම්පූර්ණ කර ඇත, ඒවා අතර

• ඉංජිනේරු තරුණ නිලධාරි පාඨමාලාව - ඉන්දියාව
• ඉංජිනේරු නිලධාරි යුධ ඉංජිනේරු උපදේශක පාඨමාලාව - ඉන්දියාව
• බිම්වෙඩි සහ පුපුරණ ද්‍රව්‍ය පිලිබඳ ඉංජිනේරු පාඨමාලාව - චීනය
• ජාත්‍යන්තර තර්ජන වලට එරෙහිව සහයෝගීතාව පිලිබඳ වැඩමුළුව -පිලිපීනය

සේවා කාලය තුල ලද පදක්කම්

ත්‍රස්ත මර්දන මෙහෙයුම්වලදී ඔහු දැක්වූ නිර්භීතකම සහ සේවය අගයමින් ඔහුට පහත සඳහන් පදක්කම් ප්‍රදානය කර ඇත.

• නැගෙනහිර මානුෂීය මෙහෙයුම් පදක්කම
• උතුරු මානුෂීය මෙහෙයුම් පදක්කම
• පූර්ණ භූමි පදක්කම
• උතුරු හා නැගෙනහිර මෙහෙයුම් පදක්කම
• වඩමාරච්චි මෙහෙයුම් පදක්කම
• රිවිරැස මෙහයුම් පදක්කම
• එක්සත් ජාතීන්ගේ පදක්කම
• විදේශ සේවා පදක්කම
• 75 වන නිදහස් සංවත්සර පදක්කම සහ ශ්‍රී ලංකා යුද හමුදා 75 වන සංවත්සර පදක්කම

පෞද්ගලික ජීවිතය

මේජර් ජෙනරාල් රසික කුමාර ජ්‍යෙෂ්ඨ නිලධාරී තුමා අනුපමා රත්නායක මහත්මිය සමඟ විවාහ වී පුතෙකු සහ දියණියකගේ ආදරණීය පියෙකි.