මේජර් ජෙනරාල් එම් කේ යු පි ගුණරත්න ආර්එස්පි එන්ඩියු පිඑස්සි අයිජි
ආඥාපති - ආසේමු (නැ)
ශ්‍රී ලංකා යුද්ධ හමුදාවේ සියලුම ක්ෂේත්‍රයන්ට අදාළ විවිධ අණදීම්¸ මාණ්ඩලික සහ උපදේශක තනතුරු පත්වීම් වල සේවය කර ඇති වසර 34 ක ආදර්ශමත් සේවා කාලයක් සහිත හමුදා නිලධාරියෙකු වන මේජර් ජෙනරාල් එම් කේ යු පි ගුණරත්න ආර්එස්පි එන්ඩියු පිඑස්සි අයිජි ආරක්ෂක සේනා (නැගෙනහිර) 26 වන ආඥාපති ලෙස 2023 අගෝස්තු මස 14 දින වැඩ භාර ගන්නා ලදී.
ඔහු 1989 පෙබරවාරි මස 17 වන දින කැඩෙට් නිලධාරියෙකු ලෙස ශ්‍රී ලංකා යුද්ධ හමුදාවට බැඳුණු අතර පකිස්ථාන යුද්ධ හමුදා විද්‍යාපීඨයේ සහ ශ්‍රී ලංකා යුද්ධ හමුදා විද්‍යාපීඨයේ පාඨමාලා අංක 31 යටතේ කැඩෙට් නිලධාරියෙකු ලෙස මූලික හමුදා පුහුණුව ලබා ගත්තේය.
ඔහු 1990 ඔක්තෝම්බර් මස 05 වන දින සිය මූලික හමුදා පුහුණුව අවසන් කිරීමෙන් පසු ශ්‍රී ලංකා කාලතුවක්කු රෙජිමේන්තුවේ දෙවන ලුතිතන්වරයෙකු ලෙස පත් වන ලදී. ඉන් පසු ඔහු 7 වන කාලතුවක්කු රෙජිමේන්තුවට ඇතුලත්ව ඛණ්ඩභාර නිලධාරියෙකු ලෙස රාජකාරී සිදුකරන ලදී.
වෘත්තීය නිපුනත්වය
ඔහුගේ කීර්තිමත් හමුදා ජීවිතය තුල ශ්‍රී ලංකා යුද්ධ හමුදාවේ විවිධ තරාතිරම්වල විවිධ අණ, මෙහෙයුම්, මාණ්ඩලික සහ උපදේශක තනතුරු ඇතුළත් වේ. ඔහුගේ අණදෙන පත්වීම් අතරට 7 වන කාලතුවක්කු රෙජිමේන්තුවේ ඛණ්ඩභාර නිලධාරි, 7 වන කාලතුවක්කු රෙජිමේන්තුවේ බතරොයි අණදෙන සහ 11 වන ආධාරක රෙජිමේන්තුව ශ්‍රී ලංකා කාලතුවක්කු හමුදාවේ අණදෙන නිලධාරී යන තනතුරු ඇතුළත් වේ. කාලතුවක්කු ඒකකයන්හි තනතුරු හැර, පහත සඳහන් පත්වීම් වල ඔහු රාජකාරි සිදුකර ඇත;
- නිලධාරි උපදේශක - ශ්‍රීලංයුහවිපී
- බලසේනා මේජර් - 223 වන බලසේනාව
- ප්‍රධාන මාණ්ඩලික නිලධාරි 2 (පුහුණු) - 21 වන සේනාංකය
- ප්‍රධාන මාණ්ඩලික නිලධාරි 1 (ක්‍රියා) - ආරක්ෂක සේනා මූලස්ථානය (නැගෙනහිර)
- ප්‍රධාන මාණ්ඩලික නිලධාරි 1 (ක්‍රියා) - 11 වන සේනාංකය
- ජ්‍යෙෂ්ඨ උපදේශක - නිලධාරී ප්‍රගමන ප්‍රවර්දන මධ්‍යස්ථානය බුත්තල
- කර්නල් ප්‍රධාන මාණ්ඩලික නිලධාරි - 11 වන සේනාංකය
- සේනාවිධායක - කාලතුවක්කු පුහුණු පාසල මින්නේරිය
- බල‍සේනාධිපති - 623 වන බලසේනාව
- නියෝජ්‍ය මධ්‍යස්ථාන සේනාවිධායක - රෙජිමේන්තු මධ්‍යස්ථානය ශ්‍රී ලංකා කාලතුවක්කු හමුදාව
- මධ්‍යස්ථාන සේනාවිධායක - රෙජිමේන්තු මධ්‍යස්ථානය ශ්‍රී ලංකා කාලතුවක්කු හමුදාව
- බ්‍රිගේඩියර් ප්‍රධාන මාණ්ඩලික - ආරක්ෂක සේනා මූලස්ථානය (යාපනය)
- සේනාංකාධිපති - 55 වන පාබල සේනාංකය
සටන්බිමේ මොහු දැක්වූ රණශූරත්වය සහ කැපවීම වෙනුවෙන් මෙම ගෞරවනීය නිලධාරියා රණ සුර පදක්කම, මානුෂීය මෙහෙයුම් පදක්කම් සහ සේවා පදක්කම් යන පදක්කම් වලින් පිදුම් ලබා ඇත.
මේජර් ජෙනරාල් එම් කේ යූ පී ගුණරත්න ආර්එස්පි එන්ඩියු පිඑස්සි අයිජි සිය කීර්තිමත් හමුදා දිවිය තුළ දෙස් විදෙස් පාඨමාලා රැසක් හදාරා ඇති අතර විවිධ සම්මන්ත්‍රණවලට සහභාගි වී ඇත.
- කණ්ඩභාර නිලධාරි උසස් පාඨමාලාව (දේශීය)
- තරුණ නිලධාරී පාඨමාලාව (දේශීය)
- කාලතුවක්කු තරුණ නිලධාරී පාඨමාලාව (ඉන්දියාව)
- කනිෂ්ඨ මාණ්ඩලික නිලධාරි පාඨමාලාව (දේශීය)
- අණ හා මාණ්ඩලික පාඨමාලාව (දේශීය)
- උසස් කාලතුවක්කු පාඨමාලාව (ක්ෂේත්‍ර) (දේශීය)
- කාතු උපදේශක පාඨමාලාව (පකිස්ථානය)
- කාලතුවක්කු බලඇණි අණදෙන්නන්ගේ පාඨමාලාව (චීනය)
- ජාතික ආරක්ෂාව පිලිබද පාඨමාලාව (චීනය)
අධ්‍යයන සුදුසුකම් සහ වෙනත්
මේජර් ජෙනරාල් එම් කේ යූ පී ගුණරත්න ආර්එස්පි එන්ඩියු පිඑස්සි අයිජි උපදේශනය සහ මනෝ සමාජීය සහාය පිළිබඳ ශාස්ත්‍රපති උපාධිය මෙන්ම උපදේශන ක්ෂේත්‍රයේ ඩිප්ලෝමාව, උසස් ජාතික ඩිප්ලෝමාව සහ පශ්චාත් උපාධි ඩිප්ලෝමාව ද සාර්ථකව හදාරා ඇත. ඔහු මහනුවර ශාන්ත සිල්වෙස්තර විද්‍යාලයේ කැපී පෙනෙන ආදි ශිෂ්‍යයෙක් වන අතර ඔහු අධ්‍යාපනයේ දීප්තිමත් ශිෂ්‍යයෙකි. ඔහු තම පාසල් කාලය තුළ විෂය බාහිර ක්‍රියාකාරකම් සඳහා ද දස්කම් දැක්වූ අතර, විශේෂයෙන් ඔහු ජාතික මට්ටමේ පාසල් බොක්සිං කණ්ඩායමේ සාමාජිකයෙකුද විය. දැනට ඔහු ශ්‍රී ලංකා යුද්ධ හමුදා බොක්සිං කමිටුවේ සභාපති තනතුර දරයි. ඔහු විවාහ වී සිටින්නේ නයෝමි රණවීර මහත්මිය සමඟ වන අතර ඔහුට දියණියන් දෙදෙනෙකු සිටී.
