යුද්ධ හමුදා සෙබළුන් දෙදෙනෙකු අරසපුරකුලම් වැවෙහි ගිලුනු මව සහ දරුවන් දෙදෙනා බේරාගනි

කිලිනොච්චි ආරක්‍ෂක සේනා මූලස්ථානය යටතේ ස්ථාපිත 66 වන සේනාංකයට අයත් 5 වන (ස්වේච්ඡා) යාන්ත්‍රික පාබල රෙජමේන්තුවේ සෙබළුන් දෙදෙනෙකු කඩිනමින් මැදිහත්වී 2019 සැප්තැම්බර් මස 07 වන දින අරසපුරකුලම් වැවෙහි ස්නානය කරමින් සිටියදී දියේ ගිලී අනතුරට ලක්වූ ආලන්කට්ටි - පුනරින් ගම්මානයේ ජිවත්වන මව සහ දරුවන් දෙදෙනාගේ ජිවිත බේරාගැනීමට සමත් වූහ.

මෙම දියේ ගිලුනු කාන්තාව සහ ඇගේ දරුවන් දෙදෙනා උදව් ඉල්ලා කෑගසමින් සිටිනු දුටු එම වැව අසල ඇති කදවුරේ සෙබළුන් දෙදෙනා ඉතා යුහුසුළුව තමන්ට සිදුවිය හැකි අනතුරු ගැන නොසිතමින් වැව්දිය සමග සටන් කරමින් වටිනා ජිවිත තුනක් (මව සහ පුතුන් දෙදෙනා) ගලවාගැනීමට සමත්වූහ.

ඉතා නිර්භීත ලෙස 5 වන (ස්වේච්ඡා) යාන්ත්‍රික පාබල රෙජිමේන්තුවේ ලාන්ස් කෝප්‍රල් ඩී.ජී.එස් අමරසිරි සහ ලාන්ස් කෝප්‍රල් ටී.ජී.ජේ.පී. ආරියරත්න මහත් පරිශ්‍රමයක් දරා දියේ ගිලෙමින් සිටි ඔවුන් තිදෙනා වැව්පිටිය වෙත රැගෙනවිත් කඩිනමින් මුලික ප්‍රථමාධාර ලබාදෙමින් එහි එක්රැස් වූ කදවුරේ අනෙකුත් සෙබළුන්ගේද සහයෝගය ඇතිව කිසිදු පමාවකින් තොරව ඔවුන්ව ළඟම පිහිටි පූනරින් රෝහල වෙත රැගෙන යන ලදී.

අනතුරුව පූනරින් රෝහල වෙතින් වෛද්‍ය උපදෙස් මත වැඩිදුර ප්‍රතිකාර සඳහා යාපනය ශික්‍ෂණ රෝහලට මාරු කර යවා ඇත. දැනට ඔවුන් තිදෙනා යහපත් සෞඛ්‍ය තත්වයෙන් පසුවන අතර, දරුවන් දෙදෙනා දැඩිසත්කාර ඒකකයෙහි ප්‍රතිකාර ලබමින් සිටි. මෙම දියේ ගිලුනු මව සහ දරුවන් දෙදෙනා බේරාගත් සෙබළුන් දෙදෙනා විශේෂත්වය වන්නේ ඔවුන් එකම පාසලෙහි, එකම ගමහි, එකම කදවුරෙහි එකට රාජකාරි කරමින් සිටින සෙබළුන් දෙදෙනෙකු වීමය.