07th February 2026 15:53:41 Hours
ශ්රී ලංකා හමුදාව සහ ලාභ නොලබන පුණ්යායතන සංවිධානයක් වන Spirit of Giving සමඟ සහයෝගයෙන්, වවුනියාවේ සුළි කුණාටුවෙන් පීඩාවට පත් සිසුන්ට උපකාර කිරීම සඳහා පොත් සහ ලිපි ද්රව්ය පරිත්යාග කිරීමේ වැඩසටහනක් පවත්වන ලදී. අත්යවශ්ය ඉගෙනුම් ද්රව්ය ලබා දීමෙන් සහ ස්වාභාවික විපතෙන් පීඩාවට පත් සිසුන් අතර, අධ්යාපන විශ්වාසය නැවත ඇති කිරීමෙන් දරුවන්ගේ අධ්යාපනයට සහාය වීම මෙම මුලපිරීමේ අරමුණ විය. මෙම වැඩසටහන සම්බන්ධීකරණය කරන ලද්දේ මේජර් ජෙනරාල් (විශ්රාමික) අනුරුද්ධ සෙනෙවිරත්න USP psc සහ බ්රිගේඩියර් (විශ්රාමික) නාලක මල්සිංහ RWP RSP USAWC psc විසිනි, ඔහු ශ්රී ලංකා හමුදාව සහ Spirit of Giving හි සභාපතිනිය අතර සම්බන්ධතාවයට පහසුකම් සැලසීය.
සභාපතිනි Rosie Thuring මහත්මියගේ නායකත්වයෙන් සහ Cecil Roche මහතා සහ Savantha De Seram මහතා ඇතුළු පිරිසකගේ සහයෝගයෙන් Spirit of Giving ආයතනයේ ත්යාගශීලී අනුග්රහය තුළින් මෙම වැඩසටහන සාර්ථක කර ගැනීමට හැකි විය. මෙම පරිත්යාග වැඩසටහන 2026 පෙබරවාරි 05 වන දින වවුනියාව මහකච්චකෝඩිය රජයේ සිංහල මිශ්ර පාසලේදී පවත්වන ලදි.
මෙම අවස්ථාවට 56 වන පාබල සේනාංකයේ සේනාංකාධිපති මේජර් ජෙනරාල් අනුරුද්ධ සෝලංගආරච්චි ආර්එස්පී එන්ඩීසී පීඑස්සී සහ 563 පාබල බලසේනාවේ අණදෙන නිලධාරී කර්නල් වරුණ දසනායක ආර්එස්පී ඇතුළු 56 වන පාබල සේනාංකයේ ජ්යෙෂ්ඨ නිලධාරීන් කිහිප දෙනෙකු සහභාගී වූහ. මෙම වැඩසටහන අතරතුර, 1 සිට 5 ශ්රේණිය දක්වා සිසුන් 75 දෙනෙකුට පොත් පැකට් සහ ලිපි ද්රව්ය ලබා දෙන ලදී. පාසලේ විදුහල්පති ප්රේමසිරි සිරිසේන මහතා මෙම මුලපිරීම බෙහෙවින් අගය කළ අතර, සහභාගී වූ සිසුන් සහ ගුරුවරුන් සඳහා තේ පැන් සංග්රහ වැඩසටහනක් ද සංවිධානය කරන ලදී.
8 වන ගැමුණු හේවා බළකායේ අණදෙන නිලධාරී මේජර් පැතුම් දිසානායක පීඑස්සී ගේ අධීක්ෂණය යටතේ නිලධාරීන් සහ අනෙකුත් නිලයන්ගේ ක්රියාකාරී සහභාගීත්වයෙන් මෙම බෙදා හැරීම සිදු කරන ලදී. මෙම වැඩසටහන සිවිල්-හමුදා සහයෝගීතාව සඳහා ශ්රී ලංකා හමුදාවේ නොසැලෙන කැපවීම සහ ආපදාවන්ට ලක් වූ ප්රජාවන්හි දරුවන්ගේ අධ්යාපනික යහපැවැත්මට සහාය වීම සඳහා එහි අඛණ්ඩ උත්සාහයන් අවධාරණය කරයි.
