11th November 2024 19:05:34 Hours
ශ්‍රී ලංකා විදුලි හා යාන්ත්‍රික ඉංජිනේරු බලකා රෙජිමේන්තු මධ්‍යස්ථානය 1950 වර්ෂයේ සිට මේ දක්වා කුමාරන් රත්නම් මාවත, කොළඹ 02 යන ලිපිනයේ ඉතා සීමිත ඉඩ ප්‍රමාණයක ස්ථානගතව තිබූ අතර, ප්‍රමාණවත් ඉඩ පහසුකම් නොමැතිවීම සහ කොළඹ නගරය වානිජ නගරයක් වශයෙන් සංවර්ධනය කිරීමේදී එම ප්‍රදේශයේ පිහිටා ඇති යුද්ධ හමුදා කඳවුරු ඉවත් කිරීමක් බොහෝ දුරට සිදුවිය හැක.
ඒ අනුව යුද්ධ හමුදාධිපති ලුතිනන් ජෙනරාල් විකුම් ලියනගේ ආර්ඩබ්පී ආර්එස්පී එන්ඩීයූ ජ්‍යෙෂ්ඨ නිලධාරි තුමාගේ උපදෙස් පරිදි යුද්ධ හමුදා නියෝජ්‍ය මාණ්ඩලික ප්‍රධාන හා ශ්‍රී ලංකා විදුලි හා යාන්ත්‍රික ඉංජිනේරු බලකාධිපති මේජර් ජෙනරාල් එස්පීඒඅයිඑම්බී සමරකෝන් එච්ඩීඑම්සී එල්එස්සී ජ්‍යෙෂ්ඨ නිලධාරි තුමාගේ මගපෙන්වීම මත කොස්ගම කඳවුරු පරිශ්‍රය වෙතින් ශ්‍රී ලංකා විදුලි හා යාන්ත්‍රික ඉංජිනේරු බලකා රෙජිමේන්තු මධ්‍යස්ථානය වෙත සියළු පහසුකම් සහිත නව කදවුරු භූමියක් වෙන් කර දෙන ලදි.
එම භූමියෙහි ශ්‍රීලවියාඉ රෙජිමේන්තුවට මහත් වු ගෞරවයක් එක් කරමින් 2024 නොවැම්බර් මස 11 වන දින 1014 පැයට යෙදුනු සුබ මොහොතින් යුද්ධ හමුදා නියෝජ්‍ය මාණ්ඩලික ප්‍රධාන හා ශ්‍රී ලංකා විදුලි හා යාන්ත්‍රික ඉංජිනේරු බලකාධිපති තුමන්ගේ සුරතින් බලකා ධජය ඔසවා 1037 ට යෙදුනු සුබ නැකතින් යුද්ධ හමුදාධිපති තුමන්ගේ සුරතින් සමරු ඵලකය නිරාවරණය කර නව රෙජිමේන්තු මධ්‍යස්ථානය පරිශ්‍රය එම කදවුරු භූමියෙහි ස්ථානගත වීම සනිටුහන් කිරීම සිදු කරන ලදී.
එම සුවිශේෂී උත්සව අවස්ථාව සඳහා ප්‍රධාන ආරාධීත අමුත්තා ලෙසින් සපැමිණි යුද්ධ හමුදාධිපතිතුමන් යුද්ධ හමුදා නියෝජ්‍ය මාණ්ඩලික ප්‍රධාන හා ශ්‍රීලවියාඉ බලකාධිපතිතුමා ඇතුලු ජ්‍යෙෂ්ඨ නිලධාරින්, නිලධාරින්, සෙසුනිලයින් හා සිවිල් සේවක මහතුන් විසින් මහත් හරසරින් යුතුව පිළිගනු ලැබීය. සමරු ඵලකය විවෘත කිරීමෙන් පසු යුද්ධ හමුදාධීපතිතුමන් විසින් එම අවස්ථාව සිහිවීම පිණිස පැලයක් රෝපණය කරන ලද අතර, ඉන් අනතරුව කඳවුරු සංචාරයක නිරත විය. කඳවුරු සංචාරය නිමාවෙන් පසු සමූහ ඡායාරූපය සඳහා පෙනීසිටින ලදී. ඉන් පසුව යුද්ධ හමුදාධිපතිතුමන් විසින් නව කඳවුරු භූමිය සඳහා වූ සන්නස් පත්‍රය රෙජිමේන්තු මධ්‍යස්ථාන සේනාවිධායකතුමා වෙත නිල වශයෙන් පිරිනැමීම සිදුකරන ලදී. මෙම අවස්ථාවට සමගාමීව සංඥා බලසේනා මූලස්ථානයටත්, 11 වන සහ 12 සංඥා බලකායන් වෙත සන්නස් පත්‍ර ප්‍රධානය කිරීමද යුද්ධ හමුදාධිපතිතුමන් විසින් සිදු කරන ලදි. මෙම අවස්ථාවේ යුද්ධ හමුදාධිපති තුමන් විසින් සියලු නිලයන් අමතා ඉතා හරවත් වූ කථාවක් පැවැත්වූ අතර, යුද්ධ හමුදා නියෝජ්‍ය මාණ්ඩලික ප්‍රධාන හා ශ්‍රීලවියාඉ බලකාධිපතිතුමා විසින්ද සියලු නිලයින් ඇමතීම සිදු කරන ලදි.
අවසාන වශයෙන් ශ්‍රීලවියාඉ රෙජිමේන්තුවේ සියලු ජ්‍යෙෂ්ඨ නිලධාරින්, නිලධාරින් , සෙසුනිලයින් හා සිවිල් සේවක මහතුන් විසින් යුද්ධ හමුදාධිපතිතුමන් ඇතුලු සියලු සම්භාවනීය අමුත්තන් වෙත ප්‍රණීත තේ පැන් සංග්‍රහයකින් සංග්‍රහ කරන ලදී.
