නිවාස අවශ්‍යතා සහිත කොමිෂන් නොලත් නිලධාරියෙකු වෙනුවෙන් නව නිවසක්

නිවාස අවශ්‍යතා සහිත කොමිෂන් නොලත් නිලධාරියෙකු වෙනුවෙන් ඉදිකරනු ලැබූ නව නිවසක් වීවෘත කිරීමේ උත්සවය 2024 ඔක්තෝබර් මස 25 දින පැවති අතර එම අවස්ථාව සඳහා ප්‍රධාන ආරාධිත අමුත්තා ලෙස ආරක්‍ෂක සේනා ආඥාපති - (බටහිර) මේජර් ජෙනරල් ඒ.එච්.එල්.ජී. අමරපාල ආර්ඩබ්ලිව්පී ආර්එස්පී එන්ඩීසී පීඑස්සී සහභාගී විය.

යුද්ධ හමුදාධිපතිතුමන්ගේ සංකල්පයකට අනුව නිවාස අවශ්‍යතා සහිත යුද්ධ හමුදා සාමාජිකයන් වෙනුවෙන් මෙම ව්‍යාපෘතිය ක්‍රියාත්මක කරනු ලබයි. 75 වන යුද්ධ හමුදා දින සංවත්සරයට සමගාමීව ක්‍රියාත්මක කරනු ලැබූ මෙම වැඩසටහන ආරක්‍ෂක සේනා ආඥාපති - (බටහිර) ගේ මඟපෙන්වීම සහ 8 බලඇණිය ශ්‍රී ලංකා සිංහ රෙජිමේන්තුවේ අණදෙන නිලධාරී මේජර් එස්.කේ.එල්.පී.කේ සිල්වා ආර්ඩබ්ලිව්පී ආර්එස්පී යූඑස්පී ගේ අධීක්‍ෂණය මත ක්‍රියාත්මක කෙරිණි. මෙම නව නිවස ලාන්ස් කෝප්‍රල් එච්.පී.එච්. දේශප්‍රිය සහ ඔහුගේ පවුලේ සමාජිකයන් වෙනුවෙන් 8 බලඇණිය ශ්‍රී ලංකා සිංහ රෙජිමේන්තුවේ භටපිරිස් විසින් ඉදිකරනු ලැබූහ.

නව නිවස විවෘත කිරීමේ උත්සවයේදී, ආගමික වතාවත් මධ්‍යයේ ප්‍රධාන ආරාධිත අමුත්තාගේ සුරතින් නිවාසලාභීයා වෙත නිල වශයෙන් යතුර ප්‍රදානය කරනු ලැබීය. දේශීය පරිත්‍යාගශීලීන්ගේ මූල්‍ය අනුග්‍රාහකත්වය මත කෙටි කාලයක් තුළ නව නිවසේ ඉදිකිරීම් කටයුතු සිදුකරනු ලැබූ අතර මෙම අවස්ථාවේදී, ආරක්‍ෂක සේනා ආඥාපති - (බටහිර) විසින් එම නිවස සෑදීමේ ව්‍යාපෘතිය සඳහා ශ්‍රම දායකත්වය දැක්වූ භටපිරිස් ඇගයීමට ලක්කළේය.

මෙම අවස්ථාව සඳහා 57 පාබල සේනාංකයේ සේනාංකාධිපති මේජර් ජෙනරල් ඩබ්ලිව්.එම්.පී.එම්. විජේසූරිය ආර්ඩබ්ලිව්පී ආර්එස්පී එන්ඩීයූ, ආරක්‍ෂක සේනා මූලස්ථානය - (බටහිර) බ්‍රිගේඩියර් ප්‍රධාන මාණ්ඩලික, 611 පාබල බලසේනාවේ බලසේනාධිපති, ආරක්‍ෂක සේනා මූලස්ථානය - (බටහිර) බ්‍රිගේඩියර් පාලක හා භඨකාර්ය සම්පාදන, 8 බලඇණිය ශ්‍රී ලංකා සිංහ රෙජිමේන්තුවේ අණදෙන නිලධාරී සහ එම ඒකකයේ භටපිරිස් සහභාගී වූහ.