බදාදා පුහුණු දින වැඩසටහනට සමගාමීව පෝෂණ විද්‍යාව පිළිබඳ දේශනයක්

ආරක්‍ෂක සේනා ආඥාපති - බටහිර මේජර් ජෙනරල් ඒ.එච්.එල්.ජි. අමරපාල ආර්ඩබ්ලිව්පී ආර්එස්පී එන්ඩීසී පීඑස්සී ගේ මඟපෙන්වීම යටතේ බදාදා පුහුණු දින වැඩසටහනට සමගාමීව 2025 ජනවාරි මස 29 දින 4 ශ්‍රී ලංකා කාලතුවක්කු හමුදා දේශන ශාලාවේදී “පෝෂණ විද්‍යාව” පිළිබඳ විශේෂ දේශනයක් පනාගොඩ යුද්ධ හමුදා මූලික රෝහලේ මේජර් පී.ජේ.එල්.එම්. ගුණසේකර විසින් පවත්වන ලදී.

මෙම දේශනයේ නිසි පෝෂණය සහ සමබල ආහාර පුරුදු වල වැදගත්කම පිළිබඳව යුද්ධ හමුදා සාමාජිකයන්ගේ දැනුම වැඩි දියුණු කිරීම මූලික අරමුණ වූ අතර, යුද්ධ හමුදා සාමාජිකයන්හට ගුණදායක පෝෂණයක් මඟින් ඔවුන්ගේ ශාරීරික හා මානසික යහ පැවැත්ම පවත්වා ගැනීමට අතිශය වැදගත් භූමිකාවක් ඉටුකරනු අතර, එය ඔවුන්ගේ කාර්ය සාධනය, පැවැත්මට සහ සෞඛ්‍යයට සෘජුවම බලපානු ලබයි. සමබල ආහාර වේලක් ලබාගැනීමෙන් ප්‍රශස්ත යෝග්‍යතාවයක් සහ හමුදා රාජකාරි සඳහා හොදින් මුහුණ දීමේ හැකියාව පිළිබඳව මෙම සැසියේදී අවධාරණය කෙරිණි.

මෙම පුහුණු වැඩසටහන සඳහා නිලධාරින් 07 දෙනෙකු සහ සෙසු නිලයන් 146 දෙනෙකු සහභාගි වූ අතර, මෙම අවස්ථාවේදී යුද්ධ හමුදා සාමාජිකන්ගේ ආහාර මූලධර්ම පිළිබඳ අවබෝධයක් සහ එදිනෙදා ජීවිතයේදී අහාර භාවිතා කරන ආකාරය පිළිබඳ දැනගැනීමට අවස්ථාවක් හිමි විය.

මෙහිදී, සමබල ආහාර වේලක් යනු කුමක්ද, පෝෂ්‍යදායී ආහාර වේලක අඩංගු පෝෂණ කොටස්, යුද්ධ හමුදා සාමාජිකයන් සඳහා සුදුසු සමබල ආහාර රටාවන් සහ ශරීරයට අවශ්‍ය ජලය ලබා ගැනීමේ වැදගත්කම මෙන්ම එහි වැදගත්කම පිළිබඳව හරවත් දේශණයක් සිදුකරන ලදී.