ගැමුණු හේවා බලකා සේවා වනිතා ශාඛාවෙන් සුභසාධන වැඩසටහනක්

ගැමුණු හේවා බලකා රෙජිමේන්තුවේ රෙජිමේන්තු අධිපති මේජර් ජෙනරල් ඩබ්ලිව්.බී.ජේ.කේ විමලරත්න ආර්ඩබ්ලිව්පී ආර්එස්පී ගේ උපදෙස් මත ගැමුණු හේවා බලකා සේවා වනිතා ශාඛාවේ සභාපතිනි ආචාර්ය දිල්රුක්‍ෂි විමලරත්න මහත්මියගේ අධීක්‍ෂණය යටතේ එම බලකා සේවා වනිතා ශාඛාව විසින් 2025 ජනවාරි මස 19 දින පාසල් උපකරණ පරිත්‍යාග කිරීමේ වැඩසටහනක් එම රෙජිමේන්තු මධ්‍යස්ථානයේදී සංවිධානය කරනු ලැබීය.

ගැමුණු හේවා බලකාය යටතේ රාජකාරියෙහි නියුතු යුද්ධ හමුදා සාමාජිකයන්ගේ පවුල් වල පාසල් අධ්‍යාපනය ලබන දරුවන්ගේ අධ්‍යාපන කටයුතු සඳහා සහාය වීමේ අරමුණින් මෙම වැඩසටහන පවත්වන ලදී. උත්සවය අතරතුරදී, සංකේතාත්මකව ප්‍රතිලාභී පාසල් දරුවන් 74 දෙනෙකු වෙත පාසල් උපකරණ කට්ටල බෙදාදුන් අතර, මෙම වැඩසටහන යටතේ රුපියල් මිලියන හතරක් වටිනා පාසල් උපකරණ කට්ටල 2,350 ක් බෙදාදෙනු ලැබීය.

වැඩසටහනෙන් පසුව, ඒ සඳහා සහභාගී වූ පිරිස එම රෙජිමේන්තු මධ්‍යස්ථානයේ රණවිරු ස්මාරකය වෙත ගොස් රට වෙනුවෙන් දිවිපිදූ රණවිරුවන්ට උපහාර දැක්වීමෙන් අනතුරුව රෙජිමේන්තු මධ්‍යස්ථානයේ පිහිටි කෞතුකාගාරය ද නැරඹීය. උත්සව කටයුතු අවසානයේදී මෙම අවස්ථාවට සහභාගී වූ 250 කට ආසන්න වූ පිරිස වෙත තේ පැන් සංග්‍රහයක් සහ දිවා ‍භෝජන සංග්‍රහයක් පිරිනමනු ලැබීය.

උත්සව අවස්ථාව සඳහා ගැමුණු හේවා බලකා රෙජිමේන්තු මධ්‍යස්ථානයේ මධ්‍යස්ථාන සේනාවිධායකතුමන්, ගැමුණු හේවා බලකා සේවා වනිතා ශාඛාවේ සාමාජිකාවන් සහ නිලධාරින් පිරිසක් සහභාගී වූහ.