29th July 2024 21:51:11 Hours
‘දෙරණ රූපවාහිනී නාලිකාව මඟින් ක්‍රියාත්මක කරන මනුසත් දෙරණ සුබසාධන ව්‍යාපෘතියේ 72 වන වැඩසටහන ශ්‍රී ලංකා යුද්ධ හමුදා විදුලි හා යාන්ත්‍රික ඉංජිනේරු සේවා වනිතා ශාඛාවේ සහයෝගයෙන් ගලේවල සිල්වත්ගල මහා විද්‍යාලයේදී 2024 ජූලි 27 දින දියත් කරන ලදී.
‘එහිදී සිවිල් සමාජ නිලධාරින්, සෙසු නිලයන්, සිවිල් කාර්ය මණ්ඩලය සහ ප්‍රදේශවාසීන්ගේ සහභාගීත්වයෙන් ප්‍රජා වැඩසටහන් කිහිපයක් පැවැත් විය.
‘මෙම අවස්ථාවට ප්‍රධාන ආරාධිත අමුත්තා ලෙස යුද්ධ හමුදා සේවා වනිතා ඒකකයේ සභාපතිනී ජානකී ලියනගේ මහත්මිය සඟින් යුද්ධ හමුදාධිපති ලුතිනන් ජෙනරල් විකුම් ලියනගේ ආර්ඩබ්ලිව්පී ආර්එස්පී එන්ඩීයූ සහභාගී වූයේය.
‘සාම්ප්‍රදායික පොල්තෙල් පහන දැල්වීමෙන් අනතුරුව මියගිය රණවිරුවන් සිහිකරමින් විනාඩියක නිශ්ශබ්දතාවයක් පවත්වා, යුද්ධ හමුදා සේවා වනිතා ඒකකයේ ගීතය ගායනා කරමින් වැඩසටහන සමාරම්භය සනිටුහන් කෙරිණ.
‘සිල්වත්ගල මහා විද්‍යාලයේ සිසු සිසුවියන් ඉදිරිපත් කළ වර්ණවත් නර්තන අංගයකින් එම අවස්ථාව වර්ණවත් විය.
‘වැඩසටහනේ පළමු අදියර සනිටුහන් කරමින් දෙරණ ටීවී මනුසත් දෙරණ වැඩසටහන මූලිකත්වයෙන් මොරගොල්ල මහා විද්‍යාලයට සහ සිල්වත්ගල මහා විද්‍යාලයට ක්‍රීඩා උපකරණ කට්ටල දෙකක් පරිත්‍යාග කරන ලදී. මේ අතර ඇක්වාලයිෆ් වෝටර් (Aqualife Water) සමාගම විසින් හොම්බාව මහා විද්‍යාලයට ජල පෙරන යන්ත්‍රයක් පරිත්‍යාග කරන ලදී.
‘දෙවන අදියරේදී ශ්‍රී ලංකා යුද්ධ හමුදාවේ නියෝජ්‍ය මාණ්ඩලික ප්‍රධානී සහ ශ්‍රී ලංකා යුද්ධ හමුදා විදුලි හා යාන්ත්‍රික ඉංජිනේරු බලකායේ බලකාධිපති මේජර් ජෙනරල් එස්.පී.ඒ.අයි.එම්.බී. සමරකෝන් එච්ඩීඑම්සී එල්එස්සී ඇතුළු එම සේවාවනිතා ශාඛාවේ සභපතිනී නන්දනී සමරකෝන් මහත්මිය විසින් ප්‍රදේශයේ තෝරාගත් දුෂ්කර පාසල් 8 ක පාසල් සිසු සිසුවියන් 150 දෙදෙනෙකු සඳහා පාසල් පාවහන් ප්‍රදානය සිදු කල අතර,මෙම පරිත්‍යායට එම සේවාවනිතා ශාඛාවේ සාමාජිකාවන් සහ පරිත්‍යාගශිලීන් දායක වූහ.
‘අනතුරුව යුද්ධ හමුදා සේවා වනිතා ඒකකයේ සභාපතිනී ජානකී ලියනගේ මහත්මිය විසින් නොමිලේ ඇස් කණ්ණාඩි 20ක් බෙදා දෙන ලදී.
‘අනතුරුව ශ්‍රී ලංකා යුද්ධ හමුදා විදුලි හා යාන්ත්‍රික ඉංජිනේරු අධ්‍යක්‍ෂ මණ්ඩලයේ පරිත්‍යාග ශීලීන් විසින් ගර්භනී මව්වරු වෙනුවෙන් වියලි සලාක පාර්සල් 20ක් පරිත්‍යාග කරන ලදී.
‘පසුව ග්‍රාමසේවක කොට්ඨාශ මට්ටමින් තෝරාගත් අවශ්‍යතා සහිත පවුල් 400ක් සඳහා යුද්ධ හමුදා සේවා වනිතා ඒකකයේ සභාපතිනී ජානකී ලියනගේ මහත්මිය විසින් වියළි සලාක පාර්සල් බෙදාදෙන ලදී.
‘මීට අමතරව යුද්ධ හමුදාධිපති තුමන් විසින් සිල්වත්ගල මහා විද්‍යාලයට රුපියල් 300,000.00ක් වටිනා සංගීත භාණ්ඩ පරිත්‍යාග කරන ලදී.
‘න්‍යාය පත්‍රයට අනුව දෙරණ ලිට්ල් ස්ටාර් ශූරයින් සිය දක්ෂතා පෙන්වමින් එම අවස්ථාව වර්ණවත් කළ අතර, ශ්‍රී ලංකා යුද්ධ හමුදා විදුලි හා යාන්ත්‍රික ඉංජිනේරු බලකායේ අධි රිද්ම සංගීත කණ්ඩායම ඊට සංගීතය සපයන ලදී.
‘අනතුරුව සිල්වත්ගල මහා විද්‍යාලයේ ප්‍රතිසංස්කරණය කරන ලද සංගීත කාමරය සේවා වනිතා ඒකකයේ සභාපතිනිය සහ යුද්ධ හමුදාධිපති තුමන් විසින් සිසු අයිතියට පත් කළහ. 5 ශ්‍රී ලංකා යුද්ධ හමුදා විදුලි හා යාන්ත්‍රික ඉංජිනේරු බලකායේ අණදෙන නිලධාරිගේ අධීක්ෂණය යටතේ යුද්ධ හමුදා ශ්‍රම දායකත්වය සහ මූල්‍ය අනුග්‍රාහකත්වය ලබාදෙමින් මෙම සංගීත කාමරය ප්‍රතිසංස්කරණය කරන ලදී.
‘අනතුරුව යුද්ධ හමුදාධිපතිතුමන් සහ යුද්ධ හමුදා සේවා වනිතා ඒකකයේ සභාපතිතුමිය සිල්වත්ගල විදුහලේ විදුහල්පතිතුමන් සමඟින් එක්ව පාසල් පරිශ්‍රය නිරීක්‍ෂණ චාරිකාවක නිරත වෙමින් එම වැඩසටහනට සහභාගි වූ ප්‍රදේශවාසීන් සමඟ සිය අදහස බෙදා ගත්තේය.
‘මෙම අවස්ථාවට ශ්‍රී ලංකා යුද්ධ හමුදා විදුලි හා යාන්ත්‍රික ඉංජිනේරු බලකා සේවාවනිතා ශාඛාවේ ජ්‍යෙෂ්ඨ සාමාජිකාවන්, දෙරණ ටීවි මනුසත් දෙරණ වැඩසටහනේ සාමාජිකයන්, සෞඛය කාර්ය මණ්ඩල, පරිත්‍යාගශීලීන් ජ්‍යෙෂ්ඨ නිලධාරීන්, නිලධාරීන්, සෙසු නිලයන්, රාජ්‍ය නොවන සංවිධාන ප්‍රධානීන්, පාසල් කාර්ය මණ්ඩලය සහ සිසුන් මෙන්ම ප්‍රදේශවාසීහු විශාල පිරිසක් සහභාගී වූහ.
